අලුත් ආදර කතාවක්

මේ කතාව උනේ දැනට අවුරුදු ගානකට කලින්. ඒ කාලෙ මම වැඩ කරපු කම්පැනි එකේ බෙස්ට් එම්ප්ලොයී ඔෆ් ද ඉයර් අවෝර්ඩ් එක මට හම්බ උන නිසා කම්පැනි එක ගානෙ මට යන්න ලැබුනා යූ එස් වලට ‍ටුවර් එකක්. ෆස්ට් ක්ලාස් රිටර්න් ටිකට් එකක් තමා හම්බ උනේ.

ඔහොම ඉද්දි ගොඩක් දවසට මම ඇවිදින්න යනව රට තොට බලන්න. එහෙම නැත්නම් දවසම ශොපිං යන එක තමා කරේ. ඒත් හැමදාම ඕක කරන්නත් බැහැනෙ. සමහර දවසට කම්මැලි හිතුනම මම මගේ එපාර්ට්මන්ට් එකට වෙලා ජොනි බ්ලූ එකක් එකක් එහෙම කඩාගෙන පොඩි ශොට් එකක් දාගෙන පාඩුවෙ ඉන්නවා.

එදා නම් මහ කුජීත දවසක්. කම්මැලිකමට මම මගේ ඒලියන් වෙයා ලැප්ටොප් එකේ ගේම් එකක් ගහ ගහ හිටිය මිසක් එදා කරන්න කිසිම වැඩක් තිබුනෙ නෑ. ගේම් ගැහිල්ලත් ටික වෙලාවක් යද්දි එපා උන නිසා සෙට් උනා බ්ලූ රේ ‍ෆිල්ම් එකක් බලන්න කියල.

ඔය අස්සේ ලැපෙන් කන පැලෙන්න සද්දයක් ආව නිසා මම කෝකටත් කියල ගිහින් බැලුවා මොකක්ද සීන් එක කියල. එතකොටයි මට මතක් උනේ මම ලැපට සරවුන්ඩ් සවුන්ඩ් සිස්ටම් එක කනෙක්ට් කරල තිබ්බෙ කියල. ජීටෝක් එකේ අලුත් කන්ටැක්ට් රික්වෙස්ට් එකක් ඇවිත්.

රික්වෙස්ට් එක කෙල්ලෙක්ගෙන්. මට කෙල්ලන්ගෙන් අඩුවක් නොතිබුනත් කෝකටත් කියල මම ඇක්සෙප්ට් කරල දැම්මා. මෙයා මාත් එක්ක විඩියෝ චැට් එකට සෙට් උනා. මගේ හයි කොලිටි කැම් එකෙන් මම ඉන්න ලක්ශරි එපාර්ට්මන්ට් එක දැක්කම කෙල්ල හරියට ඉම්ප්‍රෙස් වෙලා.

ඒත් ඒ වෙනකොටත් වෙන කොල්ලෙක්ට මේ කෙල්ලගෙ හිත ගිහින් තිබුනෙ. ටික දවසක් වීඩියෝ චැට් කරද්දි මෙයා මට ඒ කොල්ලගෙ පික් එකක් එවුවා. අය්යෝ මගෙ අහලකින් වත් තියන්න බෑ. මම වගේ හැන්ඩ්සම් කොල්ලෙක් එක්ක ගත්තම ඌ නිකම් වඳුරෙක් වගේ.

ඔහොම ටික දවසක් චැට් කරගෙන යද්දි දවසක් මට එස් එම් එස් එකක් ආව දන්නෙ නැති නොම්මරේකින්. මට තිබුන පුදුමේ මගේ සැම්සුන්ග් ගැලැක්සි 2 එකට නෙමේ මැසේජ් එක ආවෙ මගේ එච් ටී සී ඉවෝ ත්‍රීඩී එකට. ගැලැක්සි 2 එකේ නොම්මරේ හැමෝම දැනගෙන හිටියට ඉවෝ එකේ නොම්මරේ කවුරුත් දැනගෙන හිටියෙ නෑ.

බලද්දි මට මැසේජ් කරල තියෙන්නෙ අර ගර්ල්. එදා එයාගේ බර්ත්ඩේ එකලු. මම විශ් කරේ නෑ කියල එස් එම් එස් කරල තියෙන්නෙ. මම ටක් ගාල ඔරිජිනල් ලිවයිස් ඩෙනිමකුයි, අමානි ටී ශර්ට් එකකුයි , ටිම්බර්ලෑන්ඩ් ශූපෙයාර් එකයි, ප්‍රාඩා සඟයි දාගෙන බැස්ස එලියට කෙල්ලට මොනා හරි ගිෆ්ට් එකක් ගන්න හිතාගෙන.

කෙල්ලට ‍රැල්ෆ් ලොරේන් හරි ටොමි ගර්ල් හරි බොඩි ස්ප්‍රේ එකක් ගන්න හිතාගෙන ටාගට් එකකට ගියත් පස්සෙ කෙල්ලගෙ ලැප්ටොප් එක කැඩිල කියල කිවුව එක මතක් උන නිසා කෙලින්ම ගියා බෙස්ට් බයි එකකට. ගිහින් එතන තිබුන ලේටස්ට් ම එච් පී ලැප්ටොප් එක අරගෙන ඩී එච් එල් කුරියර් එකෙන් එක්ප්‍රස් ඩිලිවරියක් විදියට ලංකාවට එවුවා.

ලැප්ටොප් එක යවල දවස් කීපයක් ගියත් කෙල්ලගෙන් ආරන්චියක්වත් නෑ. මගේ ෆෝන් එකේ රෝමිං තිබ්බ නිසා මම එවෙලෙම කෝල් කරල බැලුවා ලංකාවෙ ඩී එච් එල් බ්‍රාන්ච් එකට. එහෙන් කියනව ලැප්ටොප් එක කෙල්ලට ඩිලිවර් කරා කියල.

වැඩේ තියෙන්නෙ ලැප්ටොප් එක ඩිලිවර් කරද්දි ඒ ඇඩ්‍රස් එකටම ඉංග්ලන්ඩ් වලින් එවපු 50 ඉන්ච් එල් ඊ ඩී ටීවී එකකුයි, ඔස්ට්‍රේලියා වලින් එවුව නිකොන් ඩී 3 එක්ස් කැමරාවකුයිත් එදාම ඩිලිවර් කරල. ඒ වෙලාවෙ තමා මට තේරුනේ මේ කෙල්ල මාව විතරක් නෙමේ වෙන උන්වත් රවට්ටලා කියල.

එදා ඉඳන් අද වෙනකම් ඒ කෙල්ලගෙන් කිසි ආරංචියක් නෑ. අය්යෝ සල්ලි. මට දුක මම බේරුනත් තාමත් මේ කෙල්ල නිසා කොල්ලො කී දෙනෙක් නම් අමාරුවෙ වැටෙනව ඇද්ද? අනේ පව් අහිංසක කොල්ලො.

ප.ලි. - මට මේ පෝස්ට් එක ලියන්න හිතුනෙ ලඟදි කියවපු බ්ලොග් එකක් නිසා. ඒකෙ එක දිගට දුක හිතෙන ආදර කතාවක් ගලා යද්දි ඒ මැද්දෙන් පත සයිස් නයෙකුත් හිමීට ඇදෙනවා දැක්කා. ඉතිං මට හිතුනා ආදර කතාවක් මැදින් නයෙක් යවන විදිය ගැන ඒ දරුවට ආදර්ශයක් වෙන්න පෝස්ට් එකක් ලියන්න. ;-)