පවුල් ඇයි අවුල්?

මම බොලොග් එක පටන් ගත්තේ මගේ ජීවිතේ ගෙවීගෙන යනකොට මම මූණ දුන්න සිද්ධි වලින්.පස්සේ මම ජොක්ස් ලියන්න ගත්තා.ඒ අතරේ මම දැක්ක දේවල් විවේචන විදියට සීරියස් පෝස්ට් ලිව්වා. ඉද හිට මට ලියන්න මෙළෝ අයිඩියා එකක් නැති වෙනකොට වට පිටේ මට ඇහෙන මම දකින කතන්දර මට ලියන්න මාතෘකා හොයලා දුන්නා.මේ ලියන්න යන පෝස්ට් එකට අයිඩියා එකක් දුන්නෙත් වටේ පිටේ ඇහෙන දකින කියවන්න වුණ කතන්දර..ගෑනු මිනිස්සු ආදරය කරනවා,කසාද බදිනවා,පවුල් කනවා ‍, එකට බෙදා හදාගෙන ජීවත් වෙනවා. සමහරු හොදින් පවුල් කනවා.තවත් සමහරු ටික කාලෙකින්ම දෙන්නට දෙන්නා එපා වෙලා මරා ගන්නවා. තවත් සමහරු ටික කාලයක් ගිහින් පවුල් කඩාගෙන තනිකඩ වෙනවා..

ගොඩක් වෙලාවට මේ දෙවල් වුණාම ඒවට මූණ දෙන්නේ ඒ කපල් එක. ඒ වුනත් වැඩිපුරම ඒ ගැන කථා කරන්නේ වටේ ඉන්න උන්. තමන්ගේ පවුල ගැන හිතනවට වඩා මිනිස්සු හිතන්නේ අනිත් උන්ගේ පවුල් ගැන. මේවා අද ඊයේ ඇති වෙච්ච සමාජ ප්‍රශ්ණයක් නෙමේ. ඉස්සර ගම් වල පවුල් වල පුතාට හරි දුවට හරි කසාද බදින්න කෙනෙක් හොයන්නේ වට පිටේ ඉන්න හැමෝගෙන්ම අහලා. පුතාට මනමාලියක් ගේන්න කලින් දෙමව්පියෝ ඒ මනමාලිගේ ගමට ගිහින් වටේ ඉන්න මිනිස්සුන්ගෙන් ඒ මනමාලි ගැන විස්තර අහනවා.මනමාලිගේ පැත්තෙනුත් ඒකම කරනවා. මේ අතරේ ඒ පවුල් වල තරහාකා‍රයෙක්ගෙන් වැරදිලාවත් විස්තර ඇහුවොත් ඌ උගේ තරහට පට්ට පල් බො‍රු කියලා ඒ මගුල කඩලා දානවා.

තාමත් ඒ වගේ දේවල් සිද්ධ වෙනවා. කසාද බදින්න කලින් මෙහෙම දේවල් වෙනවා වගේම කසාද බැන්දට පස්සෙත් ඒ වගේ දේවල් සෑහෙන්න සිද්ධ වෙනවා. අලුතින් මනමාලියෙක් අල්ලපු ගෙදර එකා කැන්දගෙන ආවහම ඒ ගැන වැඩිපුරම හොයලා බලන්නේ අල්ලපු ගෙදර ඉන්න උන්..හදිසියේවත් නැන්දම්මා ලේලී ප්‍රශ්ණ වුනොත් ඒ ප්‍රශ්න වලට මැදිහත් වෙන්නේ අල්ලපු ගෙදර ගෑනු කෙනා.. මිනිස්සු පුදුමාකාර විදියට අනුන්ගේ පවුල් ප්‍රශ්ණ ගැන උනන්දුයි. කවුරු හරි පවුලක් හොදින් පවුල කනකොට සමහර යාළුවෝ කියාගත්ත අය ඔන්න ටිකෙන් ටික ඒ පවුල් වල මැද්දට එනවා..

ඔන්න පිරිමියාගේ පැත්තෙන් උගේ යාළුවෝ ඌට යොමුකරන ප්‍රශ්න

1) මචං උඹේ ගෑනි උඹට හොදට සළකනවාද?
2) මචං මුල ඉදන්ම ගෑනිව උඹට ඕන විදියට හදාගනින්
3) මචං මට ආරංචි වුණා උඹේ ගෑනිට අරුත් එක්ක පළහිලව්වක් තිබුනා කියලා
4) උඹට ගෑනිව හොදටම ෂුවර්ද?
5) ගෑනි‍ගේ පදේට නටන්න එපා බං.බලපන් මට වෙලා තියෙන දේ
6) මචං තමන්ගේ කසාද ගෑනිව උනත් විශ්වාස කරන්න එපා. ගෑනු කියන්නේ ජරා ජාතියක් බං

මෙන්න මේ වගේම ගෑනුකෙනාගේ යාළුවෝ එයාට යොමු කරන ප්‍රශ්ණ

1) ඔයාගේ හස්බන්ඩ් ඔයාට හොදට සළකනවද?
2) මිනිහව මුල ඉදන්ම ඔයාට ඕන විදියට හදාගන්න. පස්සට කරදර වෙයි
3) මට ආරංචි වුණා ඔයාගේ හස්බන්ඩ්ට ගොඩක් ගෑනු පළහිලව් තිබුනා කියලා.අනේ මම කිව්වා කියලා කියන්න එපා
4) ඔයාට හස්බන්ඩ්ව හොදටම ෂුවර්ද?
5) මිනිහට ඕන විදියට නටන්න එපා.කාන්තා නිදහස නැති කරගන්න එපා
6) මිනිස්සු කියන්නේ විෂබීජ වගේ ජාතියක්.සත පහකට විශ්වාස කරන්න එපා

මෙන්න මෙහෙම ළග ඉන්න උන් හෙමින් පවුල් අතරට ඇවිත් ගෑනුකෙනාගෙයි පිරිමිකෙනාගෙයි ඔලුවට දහසකුත් ප්‍රශ්ණ දානවා. අවාසනාවකට සමහර උන් ඒවා ගැන හිතන්න පටන් ගන්නවා. ඊට පස්සේ ඒ යාළුවන්ගෙන්ම පවුල් ජීවිතේට අවවාද අරගන්නවා. දැන් දෙන්නට දෙන්නා යාළු වෙලා පවුල් උන උන්ගේ පවුල් රන් කරන්නේ වටේ ඉන්න උන්. ටික දවසකින් ඒ පවුල් වල අවුල්. අන්තිමට දෙන්නා දෙමහල්ලෝ කසාදෙට තිත තියලා දික්කසාද වෙනවා.

එහෙම දික්කසාද වුණාම මුලින් පවුල් ඇතුලේ පදිංචි වෙලා හිටපු උන් තැනින් තැන මෙහෙම කියව කියව යනවා..

1 අපරාදේ හොද ගෑනි .අරුත් එක්ක ඉන්න පුළුවන්ද බං. ඌ බේබද්දා
2 ෂුවර් එකටම උගේ ගෑනිට වෙන මිනිහෙක් හිටියා
3 මචං ආරංචිද අරූගේ පවුල කැඩිලා..
4 මිනිහා ඒකිගේ ජීවිතේ කෑවා
5 ෂුවර් එකටම මිනිහා බඩුකාරයෙක්.
6 අනේ බං ගෑනු මිනිස්සු කොහෙන් හොයාගන්න බැරිද

ඔන්න ඔය විදියට ගොඩක් උන්ගේ පවුල් අවුල්. සමහර පවුල් එහෙම අවුල් කරන්න බැරි නිසාමත් ඒත් ඒ අය පවුල් කනවා බලන් ඉන්න බැරි නිසාමත්

1 උන්ගේ පවුල් ජීවිතේ අපායක්නේ බං.. ‍
2 උන් පවුල් කන්නේ ලෝකෙට පේන්නනේ බං
3 ඔන්න බලපං බං උන් දෙන්නා කී දවසක් පවුල් කයිද කියලා
4 ඒකිත් ගෑනියෙක්ද බං
5 අරුත් මිනිහෙක්ද බං

මෙන්න මෙහෙම කියන කරන උන් අපි වටේම ඉන්නවා. පවුල් කන දෙන්නට නැති වගකීමක් යුතුකමක් අනිත් අයට තියනවා. දෙන්නට දෙන්නා අවබෝධෙන් තමන්ගේ පවුල ඇතුලේ ජීවත් වෙනවා නම් කිසිම එකෙක්ට ඒ පවුල් ඇතුළට ඇවිත් පදිංචි වෙන්න බෑ.. ඒ නිසා තමන්ගේ වටේ ඉන්න උන් තමන්ගේ පවුල් ජීවිතේ ගැන කතන්දර කියනවා නං  ඒ උන්ට කුහක කමට දත කාගෙන ඉන්න බැරුව කියන කතන්දර කියලා ඒවා හිනා වෙලා අයින් කරන එක තමයි කරන්න තියෙන හොදම දේ..

ප . ලි - මමත් දැන් පවුලක් වෙලා ඉන්න නිසා වෙන්නැති මේ වගේ මාතෘකා ගැන ලියන්න මට හිතෙන්නේ. කකා කියනව වගේ දැන් ටිකක් වයසට ගිහින් නේ. ඒකත් නරකම නෑ..සෑහෙන්න කාලයක් බූට් කාලා , සෙට් වෙන්නේ නැති ‍තැන් වල අමාරුවෙන් සෙට් වෙන්න ගිහින් අවුල් වෙලා අන්තිමට මම මට හරියන කෙල්ලෙක් එක්ක පවුල් වුණා. පවුලක් වෙනවා කියන එකේ එකම වෙනස තනිකඩ කාලේ හිතන්න ඕන උනේ නැති වගකීම් ගැන හිතලා වැඩ කරන්න වුණ එක විතරයි. එතනින් එහාට කිසිම දෙයක් වෙනස් වෙලා නෑ. අන්න ඒකයි මම හිතන විදියට වෙන්න ඕන හොදම දේ...