මටත් බ්ලොග් එකක් ලියන්න ඕනෙ

ඔ‍ෆිස් එකේ වැඩ කර කර ඉද්දි මට ආව කෝල් එකක්. ගොඩක් බිසි වෙලාවට ෆෝන් එකට ආන්සර් කරන එක මම අකමැතිම දෙයක් උනත් කෝල් එක ආව නොම්මරේ ආන්සර් නොකරම බැරි නිසා ආන්සර් කරා.

මම : හෙලෝ
කෝලර් : මට පොඩි උදවුවක් ඕනෙ
මම : කියන්න, පුලුවන් දෙයක් නම් කරල දෙන්නම්
කෝලර් : මටත් බ්ලොග් එකක් ලියන්න ඕනෙ
මම : ඒ මොකෝ හදිසියෙම
කෝලර් : නෑ මේ කම්මැලිකමට
මම : හරි දැන් ලියන්න නමක් තියෙනවද?
කෝලර් : මගේ නමින් ලියන්න හිතන් ඉන්නෙ
මම : විකාර කියන්න එපා, ඇත්ත නමින් මමවත් ලියන්නෙ නෑ
කෝලර් : එහෙනම්?
මම : අපි දාමු වැහි ලිහිණි කියල
කෝලර් : හරි ඉතින්
මම : ඊලඟට බ්ලොග් එකට නමක් ඕනෙ
කෝලර් : ඒකට මොකක්ද දාන්නේ?
මම : හ්ම්ම්... අපි දාමු "වැස්ස කඩා වැටෙන්න ලඟයි" කියල
කෝලර් : ඒක නම් ලස්සනයි
මම : අනික ප්‍රොෆයිල් එකක් හදාගන්න ඕනෙ. හැබැයි ඒකෙ ඇත්ත විස්තර මොකුත්ම දාන්න එපා
කෝලර් : මම බැඳල කියල දාන්නත් එපාද?
මම : අපෝ ඒක කොහොමටවත් දාන්න එපා
කෝලර් : මම බැන්ද උනාට දැන් තනියමනෙ ඉන්නෙ
මම : සමහරවිට එහෙම දැම්මොත් වැඩිය හොඳ වෙන්නත් පුලුවන්
කෝලර් : තව මොනාද කරන්න ඕනෙ?
මම : ෆේස්බුක් එකවුන්ට් එකකුත් ඕනෙ වෙනව. ඒක මම හදල දෙන්නම් හින්දි නිලියෙක්ගෙ ෆොටෝ එකක් එහෙම දාල
කෝලර් : හරි ඔය ඔක්කොම හදාගත්තට පස්සෙ මොනාද මම ලියන්නෙ
මම : එහෙනම් පොශ් විදියට අමාරු සිංහලෙන් ලියන්න මම අරහෙ ගියා මෙහේ ගියා අරම කරා මෙහෙම කරා කියල. හැබැයි ගිය තැනක නමක් හරියට කියන්නත් එපා, කරපු දෙයක් හරියට කියන්නත් එපා.
කෝලර් : ඒ මොකෝ
මම : කට්ටිය මල්ල ඇරල බලනවට වඩා ඔබල බලන්න ආසයි. ඉතිං කෙලින් නොකිය ඉන්නකොට හෝ ගාල කට්ටිය අහයි ඔයා අරහේ නේද ගියේ, මෙවුව නේද කරේ කියල
කෝලර් : මම එහෙම ලියන්න ආස නෑ
මම : හරි, ලියන දේ එච්චර ලොකු වැදගත් කමක් නෑ ගෑනු කෙනෙක්ට. ඔයා කඩේ ගිහින් සීනි කිලෝ එකයි, තේකොල දෙසිය පනහයි ගෙනාපු එක ගැන උනත් පෝස්ට් එකක් දාන්න
කෝලර් : එතකොට
මම : කොල්ලො කුරුට්ටො ඇවිල්ල ලංකාවෙ තියෙන හොඳම තේකොල ජාතියෙ ඉඳල තේ වවන හැටි ගැන ඉඳල කමෙන්ට් කරයි
කෝලර් : ඉතිං එතකොට මම මොකක්ද කරන්න ඕනෙ
මම : ඒ හැම කමෙන්ට් එකටම මතක ඇතුව රිප්ලයි එකක් දාන්න, දෙන්න රිප්ලයි එකක් නැත්නම් "හිකිස්, පට්ට, සුපිරි, +++" ඔන්න ඔය වගේ එකක් හරි දාන්න
කෝලර් : දැන් මම ලියන්න ගත්තම ඒව කට්ටිය බලයිද?
මම : මම කිවුව විදියට කරොත් පට ගාල කට්ටිය බලන්න සෙට් වෙයි. අන්තිමට ෆේස්බුක් චැට් කරන්න එහෙම අරගෙන කරදරයක් උනොත් නම් ඔන්න මම නෑ
කෝලර් : නෑ නෑ එවුව මම බලාගන්නම්
මම : දැනට ඔය ඇති, ඔය ටික කරා නම් ගොඩ
කෝලර් : එහෙනම් මම තියන්නම් පුතේ, තුණුරුවන් සරණයි. උඹ සීයගෙ අවුරුද්දේ දානෙට ගමේ එනව නේද?
මම : ඔව් ආච්චි අනිවාර්යෙන්ම එනවා

ප.ලි : මේක ඊයේ රෑ දැක්ක හීනයක්ම වෙච්ච එක හොඳා. ;-)